KALIBO, Aklan—Mas pang pagapabaskugon ro police visibility sa mga istratehikong lugar sa probinsiya it Aklan eabi eon sa banwa it kalibo kontra sa mga nagakatabu nga serye it panakawan.
Suno kay PSSgt. Leonelyn Artes, tagapaghambae it Aklan Police Provincial Office ukon APPO nga nagpaguwa eon it direktiba angot kara si provincial director PCol. Victorino Romanillos Jr., sa mga hepe it nagkaeain-eain nga municipal police stations.
Angot kara, ginlaygayan nana ro tanan nga maging vigilante kontra sa mga manakaw eabi eon kon gabi-i ag hamuok ro katueugon .
Dapat suno kana nga magpatuman it kaugalingon nga security measures para sa andang kaeowasan ag pag-amlig sa andang mga propiyedad.
Ginrekomenda man it APPO ro pag-install it CCTV Camera ag alarm system sa mga baeay, i-double check ro mga lock it baeay antes nga magpanaw , indi magtau it anuman nga detalye ukon makipag istorya sa mga makadueudang tawo, itago ro mga importanteng bagay sa eowas nga lugar, magpasakop sa mga programa sa community crime watch ag likawan nga mag-post sa social media it mga impormasyon nga posibleng makatau it kahigayunan sa mga manakaw ag makaangkon it hotline numbers para sa insigidang pagresponde it mga otoridad.
