Nagpangayo it pagpasaylo si Pope Francisco sa mga Indigenous people sa Canada angot sa natabo nga pagpang-abuso sa mga raya sa pilang residential school idtu nga ginapadaeagan it simbahan.
Raya hay matapos nga maeakot ro simbahang katolika sa insidenteng kapin sa 150,000 nga indigenous children sa Canada ro napaeayo sa tagsa-tagsa nga mga pamilya ag pilit nga ginpadaea sa 139 residential schools kung siin naka-eksperyensya ro mga raya it psychological, physical, ag sexual abuse ko dag-on 1800 hasta 1990.
Suno sa mga awtoridad, matapos ro maabu nga mga imbestigasyon nga ginpatigayun sa dating residential school hay nadiskubrehan ro mga owa it markang eubnganan it mga unga nga naga-abot sa masobra 4,000.
Sa anang naging pahayag sa Vatican hay ginbatikos man it Santo Papa ro natungdan nga “ideological colonization” kung siin maabu nga mga pamatan-on ro naging biktima ag ginpakabudlayan.
