JAKARTA, Indonesia – Insigida nga nakipagpueong si Pope Francis pag-abot nana sa Jakarta, Indonesia sa mga refugee halin sa Jesuit Refugee Service.
Ro mga unga idto hay gin-alagaan it mga Dominican sisters.
Kaibahan eun man sa nakapueong it Santo Papa ro mga may edad ag mga homeless nga gin-alalayan it Indonesian Community of Sant’Egidio.
Una sa Indonesia ro Santo Papa bilang pag-umpisa it anang ika-45 Apostolic Journey sa Asya ag Oceania.
Makabig nga raya ro anang pinakamahaba ag pinakamabuhay nga biyahe halin kat makapungko imaw sa puwesto.
Pila sa mga pagabisitahon kara hay ro Papua New Genuia, Timor Leste ag Singapore sa sueod it 10 adlaw nga pagbisita kara.
Ginasaligan nga makasalamuha kara ro mga opisyal it mga nasambitan nga nasyon ag maghimo man idto it misa sa kada nasyon.
Matandaan nga pag-abot kara sa Indonesia ku adlaw it Martes hay naging mainit ro pagsug-aeaw kana it mga pumueoyo.
Ginsug-aeaw imaw it mga religious affairs minister, ambassador to the Vatican ag pilang obispo sa nasambitan nga nasyon.
Ro Indonesia nga Muslim-majority nga nasyon hay may una nga 3 percent eamang ro katoliko.
Pahayag ni Indonesian President Joko Widodo nga mabuhay eun nanda nga gin-imbitahan ro Santo Papa apang nag-agi ro COVID-19 pandemic ngani raya hay napurnada it pilang dag-on.
Kaibahan man it Santo Papa sa nasambit nga pagbisita sa mga nasyon si Cardinal Luis Antonio Tagle ro Pro-Prefect for the Section of Evangelization of Dicastery for Evangelization.
Ginbisita ni Tagle ro Carolus Hospital sa Indonesia kun siin naghimo raya it misa ag ginpangamuyo ro mga idto nga may mga masakit pati man ro mga health workers.
