KALIBO, Aklan – – – Ginpahisayud ni Cong. Carlito Marquez sa tanan nga mga pumueoyong Aklanon nga naka-eusot sa ikatlo ag ulihing pagbasa sa Kamara ro postponement it Barangay ag Sangguniang Kabataan (SK) elections.
Suno kay Marquez, naipasa ro House Bill 6308 pinaagi sa botong 212 nga “YES,” 10 nga “No” ag zero nga abstention.
Gin pahayag ni Cong. Marquez nga raya hay maadto eon sa Senado para sa pagtalakay agud mapirmahan man ni Pangueong Rodrigo Duterte.
Base sa nasambit nga proposisyong, igapa-iway sigon sa maabot nga buean it Oktubre ro Barangay ag SK elections ag igapatigayon eon lang sa ikaywang Lunes it Mayo 2018.
May kaangtanan kara, magatinir pa sigon sa pwesto ro mga presenting nakapungkong barangay officials bangod sa hold-over capacity nga ginapatuman.
Gin kumpirma man ni Marquez, sambilog sigon imaw sa 212 nga nagboto it “YES”.
