KALIBO, Aklan — Padayun nga ginapaeapad it provincial government it Aklan ro programa sa P20 kada kilo nga bugas sa bilog nga probinsiya agud masiguro ro access sa masarangan sa boesa nga pagkaon sa tunga it padayun nga pagtaas it presyo it mga baeak-eon tuga it oil crisis.
Suno kay Engr. Alexys Apolonio, head it Office of the Provincial Agriculturist (OPA)-Aklan nga mas pa nga ginpabaskog ro mga tikang agud nga mapaeapad ro distribusyon it rice subsidy.
Sa makaron hay ginataw-an nanda it kahigayunan ro kada barangay nga makabo-oe kanda it 100 bags it bugas agud nga sanda ro magabaligya sa andang mga pumueuyu.
Mas gusto sigon nanda nga ro barangay ro magpatigayon it distribusyon bangud nga sanda ro nakakilaea sa andang mga pumueuyu agud nga malikawan nga mag-doble ro mga benepisyaryo .
Nasayuran nga kada household hay ginapasugtan nga makabakae it hasta sa 10 kilo it bugas kada buean.
Apang ro andang pagbaligya hay nakadepende sa availability it bugas sa warehouse it National Food Authority (NFA) kun sa siin maskin sanda hay nagabaligya man it baratong bugas sa Linabuan Sur, Banga.
Ginaeauman suno kana nga sa buean it Mayo hay makaangkon eon man it bastante nga suplay it bugas sa NFA warehouse bangud sa makaron hay sigidas ro andang milling ukon pag-galing.
