Sangkiri eon lang ro adjustment nga ginahimo it Qatar government sa pagsaayos it mga playing venues sa nakataeana nga FIFA World Cup nga maga-umpisa sa Nobyembre 20.
Suno kay Bombo International Correspondent Nemia Roselo, tumandok it Brgy. Dingle, Banga apang presenteng nagatrabaho sa nasyon it Qatar nga todo ro preparasyon makaron sa nasambit nga nasyon kon siin makit-an ro mga saeakyan nga nakapintura ro FIFA World Cup 2022 nga posibleng raya ro pagasakyan it mga players ag delegasyon maghalin sa nagkaeain-eain nga nasyon nga may participating teams.
Ginpahayag dugang nga hugot ro seguridad nga ginapatuman makaron it Qatar authorities kon siin maskin nga magbueo it litrato sa mga playing venues hay ginadumilian it mga natungdan nga otoridad.
Ro ticket hay mabakae sa presyo nga P60,000-P100,000 pesos kon siin kinahang-ean nga may early bookings bangud sa ginaeauman nga magkaubusan raya samtang nagahilapit ro hampang.
Kapin sa waeong ka stadium ro nakataeana nga pagahampangan kon siin makit-an ro hugot nga seguridad nga ginapatuman sa makaron ag ro mga hotels hay punuan eon.
Tanan suno kana hay nagabantay eon sa pag-umpisa it FIFA World Cup 2022.
