KALIBO, Aklan — Hugut nga nagpaandam ro Police Regional Office (PRO 6) sa mga indibidwal nga maga-eabag sa temporary suspension it Permit to Carry Firearms Outside Residence kadungan sa pagahiwaton nga Association of Southeast Asian Nations (ASEAN) meeting sa isla it Boracay.
Suno kay P/Major Lailyn Sencil, tagapaghambae it PRO-6 nga ro nasambit nga tikang hay bilang kaparte it mas ginpabaskog nga seguridad, kun sa siin, pagadakpon ro sin-o man nga magadaea it armas .
Pila sigon sa mga kasong posibleng paga atubangon hay ro pag-eabag sa Section 28 it Republic Act No. 10591, ukon Comprehensive Firearms and Ammunition Regulation Act.
Mag-eowas kara, pwede man nga ma-revoke ro nasambit nga permit ag licensed to own and possess firearms registration.
Samtang, gindugang pa ni Major Sencil nga pagkatapos it ASEAN meeting sa Iloilo City hay maga-umpisa man ro deployment it PRO 6 sa Aklan partikular sa Boracay sa Pebrero 28.
Madumduman nga nauna eon nga gin anunsyo it Aklan Police Provincial Office ro temporaryong pagsuspinde it PTCFOR bilang pagpahaum sa seguridad para sa 2026 ASEAN Summit Meetings sa Isla it Boracay .
Maga-umpisa raya sa alas-12:01 it aga-aga it Pebrero 28, 2026 hasta alas-11:59 it gabi-i it Marso 8, 2026, kamana man sa Marso 21 hasta 28, Setyembre 17 hasta 27 ag sa Nobyembre 14 hasta Nobyembre 22.
