KALIBO, Aklan—Uman nga nakalista ro probinsya it Aklan it panibag-ong kaso it tinamaan it coronavirus disease ukon Covid-19.
Base sa case bulletin number 151 nga ginpaguwa it Department of Health Western Visayas for Health Development, ro panibag-ong kaso it Aklan hay sangka 24 anyos nga eaeaki nga taga banwa it Malinao ag sangka authorize person outside resident ukon ro ginatawag nga APOR.
Sa pihak kara, nakalista man it sangka recovery patient ro probinsya ag raya hay ro 55-anyos nga babaye nga taga banwa it Ibajay.
Sa pinakaulihing Covid-19 case summary it Provincial Health Office pinaagi man sa Provincial Epidemiological Surveillance and Response Unit, kapin sa 1,246 eon ro natest sa Covid-19 kon sa siin 26 ro kabilugang kumpirmadong kaso it sakit halin kat nag-eopok ro pandemya.
Sa nasambitang numero, 19 eon ro nakarecover; sambilog ro namatay ag may active cases makaron nga an-om nga ginakaeakipan it sambilog nga admitted, 4 sa quarantine facility ag sambilog ro naka-home quarantine.
Sa kabilugan, ro Western Visayas hay nakalista eon it 3,651 confirmed Covid-19 case kon sa siin sa nasambit nga numero hay 1,553 ro total nga nagmayad matapos ro pagbueong ag quarantine period samtang 55 eon man ro nailistang namatay.
Sa makaron hay may active cases pa nga 2,043 kon sa siin 83.60% ro mga asymptomatic ukon uwa it sintomas it sakit nga nabatyagan.
