KALIBO, Aklan—Nagpatigayon it legislative inquiry ro natungdan nga komitiba it Sanguniang Panlalawigan angot sa problema sa sand bars sa Aklan river.
Natalakay ro concern sa kasubaan kasunod it mga reklamo bangud sa sigidas nga pagkabkab it tubi sa eapok sa bibi it suba nga ginatunaan it mga pagbaha ag pagkahueog it mga panimaeay.
Ginpahayag ni Aklan first district board member Nemesio Neron nga may authority ro Environmental Management Bureau it Department of Environment and Natural Resources nga imonitor ro aktibidad sa kasubaan partikular sa operation it quarrying.
Apang, uwa sigon nagpakita ro EMB-DENR sa ginpatigayon nga committee hearing.
May mga rekomendasyon kunta nga ginpahaom ro komitiba ag iba pang concern person partikular ro punong barangay it Polo, Banga bangud nga sambilog sanda sa mga apektado it problema sa nasambit nga suba.
Ginpahayag dugang ni Neron nga dapat mataw-an it nagakaigong kasayuran ro mga nagabueo it sand and gravel agud nga inde makakriar it sand bars.
Madumduman nga nagakabaeaka ro mga residente nga naga-istar sa binit it suba nga may posibilidad nga mahueog ro andang panimaeay bangud sa sigidas man nga pagkaeoka it mga eapok nga nagaresulta sa pag-eapad it suba eabi eon sa mga uwa pa nabutangan it revetment wall.
