Nagapadayon ro pagkalap it datos it provincial agriculture angot sa halit nga gin-aywanan it bagyong Paeng sa mga pananom sa bilog nga probinsya it Aklan.
Suno kay Engr. Alexis Apolonio, assistant to the provincial agriculturist nga nakabueo eon sanda it datos maghalin sa banwa it Libacao, Altavas ag Balete haeos daywang dominggo eon ro nakataliwan kat nagpanaeasa ro maeapnagon nga pagbaha nga tuga it shearline bangud sa bagyong Paeng.
Mabahoe nga nahalitan ro sa paeay nga nagaabot sa 594 hectares registered farmland nga katunga kara hay partially damage nga nakaapekto sa 1,417 farmers kon siin kaabuan kara hay maghalin sa banwa it Altavas, Balete ag Libacao.
Angot kara, umabot sa P19,490,000 ro naging danyos apang posible pa raya nga madugangan sa mga masunod nga inadlaw.
Ginpahayag dugang ni Apolonio nga pag-abot mat-a sa kamaisan hay eubus nga apektado kara ro mga mangunguma nga maghalin sa munisipalidad it Libacao, Malinao, Madalag ag Altavas nga umabot sa 159 hectares nga nakaapekto sa 253 farmers ag may danyos nga kapin sa P6,157,000 pesos.
Kamana man sa mga tinuean-on hay kapin sa 2,107 farmers ro apektado nga may 248 hectares nga taeamnan ag nakalista it danyos nga umabot sa P128 milyon pesos.
May kaangtanan kara, nag-apela sigon sanda sa Department of Agriculture nga alalayan ro mga apektadong mangunguma bangud nga aminado sanda nga inde masarangan it andang nabilin nga pondo ro pang ayuda sa mga raya.
Haeos tanan nga mga seedlings hay napanupod eon man nanda ag sa makaraya nga buean hay sangkiri eon lang gid ro andang pondo nga bukon it bastante sa ayuda nga kinahang-ean it mga mangunguma
