Nagapadayon ro hugot nga pagbantay it Office of the Provincial Veterinarian ag iba pang law enforcement agency sa mga nakataeana nga quarantine border control checkpoint partikular sa banwa it Altavas, Buruanga, Nabas ag Caticlan, Malay.
Suno kay Dr. Mabel Seniel, provincial veterinarian nga tuyo it 24/7 nga pagbantay ag pagsikyar nga matapna ag malikawan ro posibleng pagsueod it African Swine Fever ukon ASF matapos nga nakalista it kaso ro pilang banwa sa probinsya it Iloilo.
Ginpaathag ni Dr. Seniel nga random ro andang pagsikyar sa mga saeakyan nga nagaagi bangud sa kakueangan sa manpower ag inugspray nga disinfectant.
May mga nag-augment sigon kanda nga iba pang law enforcement agency kaparehas it Bureau of Fire Protection ag Philippine National Police.
Kinahang-ean suno kana nga kabuligan it tanan nga inde makasueod ro virus sa bilog nga probinsya it Aklan agud nga inde maapektuhan ro produksyon ag suppy it baboy.
Angot kara, ginpasiguro ni Dr. Seniel nga nagapabilin nga bastante ro supply it baboy sa bilog nga probinsya eabi eon makaron nga nagahilapit ro okasyon it fiesta minatayy, paskwa ag bag-ong dag-on.
Samtang sa pihak nga parte, nag-apela si Dr. Seniel sa mga social media users nga maging sensitibo ag inde sanda pag-ibully.
Raya hay kasunod it facebook post it sangka netizen kon siin ginpa-ila-ila kara ro nakaeosot sigon nga karne it baboy halin sa syudad it Iloilo.
Mabahoe sigon raya nga pag-insulto kanda bangud una sa tanan hay random ro andang pagsikyar sa tanan nga nagaagi sa border checkpoint.
Suno kana, inde nanda matigsambilog nga buksan ro bag it mga byahero agud matan-aw kon may daea ro mga raya nga karne halin sa infected areas.
Apela kara nga maging responsable ro tanan bangud nga ro bilog nga probinsya ro apektado kara engkaso nga makasueod ro virus
