BANGA, Aklan — Matsa may gina angkon nga anting-anting ro rape suspect nga si Jerick Ocampo Ramirez alyas Stanley Mercado sa anang pag-eskapo sa mga naga-eagas kana.
Raya ro ginpahayag ni Rafol Ringo, sambilog sa mga barangay tanod it Camanci Norte, Numancia nga nagpanguna sa pagbantay ag pag-eagas sa suspek.
Suno kana nga bandang alas-11 kabi-i hay na monitor ro presensiya it suspek nga nagapa-agto eon sa andang lugar rason nga gin bantayan nanda ro anang pag-abot.
Dugang pa nga kat andang ginpahayagan it flashlight ag makumpirma nga imaw ro pugante nga ginatugis hay ginmanduan nanda raya nga magsurender kaibahan ro anang bitbit nga sanggot.
Apang gulpi raya nga dumaeagan paagto sa direksyon it kaaromahan ag makataliwan ro pilang minuto hay nagguwa raya ag nag alsa it anang alima.
Kat hana eon nanda nga dakpon hay uman nga nagdaeagan paagto sa dagat ag nag-eangoy.
Gin-einapog sigon raya it mga tawo it bato rason nga nag-eayo ro anang linanguyan nga umabot it kapin sa 100 meters halin sa pangpang.
Bangud nga masyadong mabaskog ro humbak, naggamit sanda it barotong de motor ag ginmanduan ro suspek nga magkapyot sa katig ag ginpa-uba it anang eambong agud nga pag abot sa pangpang hay indi eon imaw makadaeagan ukon makasukoe.
Grabe suno kana ro andang pagkangawa bangud nga mag-eowas nga masyadong madasig nga magdaeagan hay madasig man raya nga mag-eangoy nga matsa may anting anting.
Aminado man ro tanod nga ginkuyog gid man it mga pumueuyu ro suspek bangud sa krimen nga nahimo ag kakugmat nga gintuga kanda kun sa siin owa haeos sanda nakatueugan .
Nasayuran nga gintapos it temprano ro klase kahapon sa Brgy. Bulwang ag iba pang lugar nga posibleng agyan it suspek bangud sa pagkabaeaka sa pwede kara nga obrahon.
