KALIBO, Aklan—Naga-apela ro mga residente it Barangay Linabuan Sur, Banga sa mga natungdan partikular sa pamunuan it Department of Public Works and Highways ukon DPWH-Aklan agud nga ipadaeum sa reconstruction ro flood control project sa nasambit nga lugar.
Suno kay Jomar Pagayunan, residente it lugar nga eubus sanda nga nagakabaeaka bangud nga amat-amat nga nagakatimpa ro eugta sa kilid it suba it akean kasunod it pagkasamad it andang revetment wall ko nagtaliwan nga dag-on.
Mas mabudlay suno kana kon mag-abot ro tiempo it tig-ueuean eabi pa ag may ginapaabot nga la niña bangud nga owa it magaprotekta sa andang komunidad ag kaiping pa nga mga lugar nga posibleng magaresulta sa pagkasamad it andang mga pangabuhian, propiyedad ag kabuhi.
Kadungan kara, nagpanawagan imaw sa andang barangay council nga buligan sa pagpaabot it andang concern sa natungdan nga ahensiya it gobyerno kamana man sa taeatapan ni 1st district congressman Carlito Marquez.
Ginasugid nga halin sa Jumarap paagto sa Linabuan Sur hay guba eon ro gin-construct nga revetment wall nga gina-alegar nga may pondo nga kapin sa 46 milyon pesos nga ginatantiya nga may haba nga 100 hasta 150 meters .
Naguba sigon raya sa pagpanaeasa it mabaskog nga uean ag pagbaha ko nagtaliwan nga dag-on .
Mag-eowas sa anang baeay, 70 nga iba pang residente ro nagapameligro nga naga-istar maeapit sa suba.
