Nagabaeay eon makaron ro Department of Education (DepEd) it sangka “learning recovery plan” nga magaserbing giya sa mga eskwelahan para masolusyunan ro learning gaps nga gintuga it COVID-19 pandemic.
Suno kay Education Secretary Leonor Briones, ginahimo nanda raya makaron bangud mas maabu pang mga eskwelahan ro nagabukas eon it andang purtahan para sa physical learning.
Gusto sigon nanda nga siguraduhon nga ro andang magiging interventions hay epektibo agud nga makaeagas ro tanan ag mapadasig ro andang pagkantigo.
Kaibahan sa mga proposed strategies hay ro pagpaeawig sa school calendar, pagpaeawig sa learning time it mga estudyante, pagtukod it learning support centers sa mga eskwelahan ag community-based learning spaces, pag-angkon it summer remediation ag intervention programs kamana man ro pag-hire it dugang nga mga learning support aides.
Kaibahan man sa recovery plan ngara hay ro pagsabat sa “socio-emotional ag behavioral recovery it mga estudyante.”
