Ginpamilit ni Batangas Representative Gerville Luistro nga bastante eon ro pagka-convict sa maskin sangka artikulo it impeachment para mapatalsik sa puwesto ag daeayon nga madiskwalipika si VP Sara Duterte sa pagbuyot it anumang posisyon sa gobyerno.
Suno kay Luistro, maga-boto ro Senado bilang impeachment court sa kada artikulo matapos mapresenta ro mga ebidensya angot it mga reklamong may kaangtanan sa confidential funds, gina-alegar nga pagpanuhoe, indi mapaathag nga yaman ag pagpamaeag.
Kun nakabuoe it 16 boto ro sangka artikulo, posible eon nga masintensyahan ro sangka impeachable official ag maipataw ro penalidad nga perpetual disqualification sa serbisyo publiko.
Ginklaro man ni Luistro nga dapat gihapon nga padayunon ro impeachment trial maskin magbuhi sa puwesto ro sangka opisyal banagud magapabilin nga istorya ro posibilidad it habambuhay nga diskwalipikasyon sa pagbuyot it pampublikong posisyon.
