KALIBO, Aklan—Kasunod it pagkondena it Aklan Media Integrated Alliance sa pagpatay sa hard-hitting broadcaster nga si Percival Mabasa ukon mas kilaea man sa tawag nga “Percy Lapid”, ginpasa it Sangguniang Panlalawigan ro sangka resolusyon agud nga hinyu-on nga punduhon eon ro bayolenteng aksyon ag pag-atake sa mga mamamahayag sa nasyon.
Suno kay Aklan 2nd district board member Jay Tejada nga bilang nagapangunang sponsor it nasambit nga resolusyon, naging baeasihan nana ro sentimiento it mga katapo it media sa Aklan.
Gintaw-an man sigon kara it punto ro pagiging akeanon ni Mabasa, pag-obra it makangieidlis nga krimen sa sangka journalists ag ro paghana it mga maeain nga elemento nga pugngan ro press freedom.
Bilang sangka broadcast journalists sa sueod it siyam nga dag-on, ginpahayag ni Tejada nga nabatyagan nana ro kalisod ag peligro sa pagtrabaho sa broadcast media rason nga kinahangean nga madepensahan ro kinamatarung sa pagpahayag ag mayad nga partner sa good governance.
Samtang, owa suno kana it may nag-oponer sa anang resolusyon ag ro tanan nana nga kaibahan hay naging co-sponsor kara.
Sa pihak nga parte, nagaeaum si board member Tejada nga eubusan nga maangkon it pamilya ro hustisya sa pagkamatay ni Mabasa matapos nga mapasakaan eon it kasong murder ro mga eakot sa krimen eakip si suspended BuCor chief Gerald Bantag ag limang iba pa.
Kumpiyansa man imaw nga maibalik kara ro pagsalig it publiko sa justice system.
