Viral makaron ro sangka steakhouse sa South Florida, United States bangud sa kakaibang dining experience kun sa siin ginapasugtan ro mga customer nga magkaon nga owa it eambong.
Kada unang Lunes it kada buean, ginapatigayon it CLASS Soiree Steakhouse sa Hollywood, Florida ro ginatawag nga “nude dining” night.
Suno sa tag-ana kara nga si Maurad Ali, ginlunsar ro konsepto agud nga maka-engganyo it mga bag-ong customer ag makatau it kakaibang eksperyensiya.
Sa unang event ko Agosto, kapin sa 20 nga katawo ro nagtambong. May bayad nga $250 para sa eaeaki, $150 para sa babaye ag $300 para sa magkapareha.
Suno sa restaurant, nagapabilin nga elegante ag propesyonal ro nasambit nga dining experience ag marespeto ro andang staff sa mga bisita.
Samtang, ginpahayag ni Joann Hussey, spokesperson it siyudad it Hollywood nga legal ro nasambit nga event bangud nga nakasuksok it eambong ro mga empleyadong aktuwal nga nagatrabaho ag nagabuyot sa operasyon it restaurant.
Padayun nga pagahiwaton it steakhouse ro kada buean nga event bilang alternatibong dining experience para sa mga customer nga naga-usoy it kakaibang pamaagi it pagkaon sa guwa.
