KALIBO, Aklan—Gindesisyunan it Rural Health Unit ukon RHU-Numancia nga ipaidaeum eon lang sa daywang domingo nga home quarantine ag indi eon pagboe-an it swab specimen para sa RT-PCR test ro sangka 29-anyos nga eaeaki nga nauna eon nga nagpositibo sa rapid antibody test.
Suno kay Dr. Cornelio Cuatchon Jr. it Provincial Health Office ukon PHO Aklan nga magabalik eon kunta sa anang trabaho ro nasambit nga eaeaki, kun sa siin, gina-require it andang kompaniya nga magpaidaeum anay sa rapid test.
Owa sigon it history of travel ro eaeaki umpisa nga mag-eupok ro coronavirus disease ukon covid 19.
Ginklaru man nana nga ro rapid test hay bukon it reliable bangud nga screening test eamang raya.
Makabig suno kana nga bukon pa raya it kumpirmadong kaso it covid 19.
Samtang,bilang precautionary measure, ginpakamayad it sangka kilaeang commercial establisiment nga ipa-home quarantine man ro sambilog sa andang empleyado nga igmanghud it eaeaki agud nga makasigurado ag maduea ro mga pagkabaeaka.
