Nakaangkon it unang round it pag-istorya ro mga mataas nga opisyal it Estados Unidos ag Iran sa Switzerland, adlaw it Lunes, kun sa siin, nagkasugot ro magtimbang nga parte sa sangka roadmap nga tuyo nga makabilog it pinal nga kasugtanan sa sueod it 60 diyas.
Suno sa joint statement it Qatar ag Pakistan, magapadayun ro technical talks sa bilog nga domingo. Nakasugtan man ro mekanismo para mapundo ro bakbakan sa Lebanon ag ro pagbukas it linya it komunikasyon agud nga masiguro ro eowas nga pag-agi it mga barkong pangkalakalan sa Strait of Hormuz.
Ginpangunahan ni US Vice President JD Vance ro pakikipagpueong sa mga opisyal it Iran. Samtang, ginpahayag ni Iranian Foreign Minister Abbas Araqchi nga nakabo-oe ro andang nasyon it mga waiver para sa pag-export it langis ag petrochemical products, pagpahilway it pilang nakapirming assets, ag pag-umpisa it reconstruction ag development plan para sa Iran.
Bago nag-umpisa ro pag-istorya, uman nga nagpaandam si US President Donald Trump nga paga-atakehon ro Iran kun uman kara nga igasarado ro Strait of Hormuz. Ginpamilit man it Iran nga kinahangean anay nga ipatuman ro pilang parte it naunang memorandum of understanding (MOU), kaibahan ro pagpahilway it assets ag pagpasugot sa pag-export it langis.
Sa pihak it owa nagakasinanto nga report halin sa magtimbang nga parte, ginpahayag it mga opisyal nga natalakay sa isyu ro Strait of Hormuz, sitwasyon sa Lebanon, isyung nukleyar, ag pagpatuman it MOU.
Matapos ipaguwa ro joint statement, nagnaba pa ro presyo it langis sa world market. Padayun man nga ginabantayan it kalibutan ro sitwasyon sa Lebanon ag ro pagbukas it Strait of Hormuz, nga importanteng aeagyan it suplay it enerhiya sa bilog nga kalibutan.
