Ginpaathag ni Aklan second district Congressman Teodorico Haresco nga sa oras it kalamidad hay uwa it first ukon second district para makatindog it uman ro Aklan.
Raya hay matapos nga nagbueo it permiso ro kongresista kay Aklan first district Congressman Carlito Marquez nga magbulig sa anang nasakupan nga nadaeasa it maeapnagon nga pagbaha ko nagtaliwan nga dominggo.
Una kara, nagtanyag it power sprayer ro opisyal sa lokal nga gobyerno it Kalibo pinaagi man kay mayor Juris Sucro kon siin ginamit raya it barangay council it Poblacion sa paglimpyo sa nagsaka nga eotay sa may bahin it C. Laserna St. sa nasambit nga banwa.
Ginpahayag dugang ni Congressman Haresco nga ro mga naka pre-position nga 7,000 food packs nga gintaeana it Department of Social Welfare Development ukon DSWD hay ginpanupod ro 2,500 sa banwa it Numancia, 1,500 sa munisipyo it Tangalan ag ro nabilin nga numero hay ginpanupod sa mga apektadong pamilya sa banwa it Kalibo.
Mag-eowas kara, nagpangayo pa sigon imaw it dugang nga food packs sa DSWD ag iba pang ayuda sa private sector, sa Office of the Civil Defense ag sa Philippine Crop Insurance Corporation ukon sa PCIC para sa mga mangunguma nga namatayan it mga kasapatan ag mangingisda nga uwa nakapaeaot it pilang adlaw bangud sa maeain nga panyempo.
