KALIBO, Aklan—Namatay samtang ginabueong sa sangka pribadong ospital ro sang dag-on ag tunga nga ungang babaye matapos nga maeumos sa kasagsagan it kapyestahan ni San Juan de Bautista sa Sitio Baybay, Barangay, Andagao, Kalibo.
Nakilaea ro biktima nga si Mary Majesty Mae Pinos ag residente it nasambit nga lugar.
Base sa paunang imbestigasyon it Kalibo Police Station, samtang nga nagakinasadya sigon ro mga kapamilya it unga bandang alas-3:00 it hapon hay gulping naduea ro biktima sa kilid it anang mga ginikanan.
Insigida sigon nanda raya nga gin-usoy ag matapos ro haeos napueong minutos hay nakita eon lang ro biktima sa bibi nga ginahampak eon it mga humbak.
Gintaw-an it paunang medikasyon it naka-standby nga rescue team it Municipal Disaster Risk Reduction Management Office (MDRRMO)-Kalibo ro unga samtang nga ginadaea sa ospital.
Apang makaron ro pilang minutong pag-revive it doktor hay ginbawian raya it anang hueam nga kabuhi.
