KALIBO, Aklan – Pasado ro sangka 25-anyos nga ama ag dating estudyante sa katatapos eamang nga Registered Electrical Engineers Licensure Examination nga si Engr. Brian Amante, halin sa Madalag, Aklan.
Raya man sigon ro anang kahigayunan nga nagtake imaw it nasambitan nga eksaminasyon.
Panugiron ni Amante nga bukon it madali ro anang inagyan, kun siin nga maabong beses nagsueod sa anang piniino nga magpundo ukon magshift it kurso daea it kabudlay ukon personal nga mga hangkat.
Paathag nana nga imaw hay naging determinado ag consistent sa anang handum nga mangin inyinhero.
Daeangpan man nana ro anang mga ginikanan, anang partner ag mga igmanghod nga nagresulta sa pagiging unang engineer sa andang bilog nga pamilya nga nagtao it eubos nga kalipay kanda.
Pagsaysay nana nga nalisdan man imaw sa anang kurso eabi eun ag puro sigon mathematics ro andang natun-an, dugang nga nagka-unga imaw ag nagkapandemic pa.
Apisar karun imaw hay naging scholar gihapon ag dugang ro suporta it anang mga ginikanan ag mga kaklase.
Sa makaron si Amante hay may partner ag daywang ka mga unga.
Laygay nana nga magsalig eamang sa proseso it kabuhi.
Nasayuran nga sa kabilugan nga 3,058 takes may una eamang nga 1,655 ro nakapasa sa nasambitan nga eksaminasyon nga ginpaguwa ro resulta ku Agosto 29.
