TANGALAN, Aklan — Arestado ro sangka 37 anyos nga babaye nga gina-alegar nga scammer sa ginkasa nga operasyon it mga operatiba it Tangalan Municipal Police Station sa kasong estafa sa andang lugar sa Sitio Ilawod, Brgy.Tondog, Tangalan, adlaw it Miyerkules, Abril 1.
Ginkilaea ro suspek sa alyas “Divine,” may asawa ag residente it nasambit nga lugar.
Imaw hay nagapangatubang sa kasong estafa nga may piyansa nga naga-abot sa P30,000.
Ro operasyon hay pinaagi sa gahum it warrant of arrest nga ginpaguwa ni Presiding Judge Maribel de Leon de Guia-Cipriano it Municipal Circuit Trial Court, Sixth Judicial Region, Ibajay-Nabas, nga may petsang Marso 31, 2026.
Sa kustodiya makaron it Tangalan MPS ro suspek para sa nagakaigo nga dokumentasyon ag disposisyon antes nga iturn-over sa korte nga natungdan.
Ginasugid nga pila sa mga nabiktima it suspek hay ro mga Akeanon nga nakabase sa Amerika kun sa siin gina-alegar nga nakakulembat it minilyong kantidad it kwarta.
Iba pa sa mga naloko ag naboe-an kara it kwarta hay taga Kalibo ag Ibajay. Ginpahayag dugang nga sambilog sa anang nabiktima nga taga-Ibajay ro nagpabulig sa National Bureau of Investigation (NBI) rason nga nadakpan ro suspek.
Samtang, ginpasiguro it kapulisan sa publiko nga padayun ro maid-id nga pagtugis sa mga wanted person ag sa pagtau it hustisya sa mga biktima it pagpangloko ag indi magkahadlok nga mag-report sa mga awtoridad agud nga insigidang mabuligan ag maprotektahan ro mga biktima.
