KALIBO, Aklan—Arestado ro sangka babaye sa ginkasa nga drug buy-bust operation it Malay PNP ag Philippine Drug Enforcement Agency ukon PDEA Aklan sa Sitio Bantod, Brgy. Manocmanoc sa isla it Boracay.
Ginkilaea ro naaresto nga si Melissa Tuclab, 49-anyos ag presenteng nagadayon sa sangka apartment sa nasambit nga lugar.
Nabueo sa anang posisyon ag kontrol ro sangka sachet it suspected shabu kabaylo it kapin sa P1,000 pesos nga marked money.
Sa ginpatigayon nga body search sa suspect, nabueo dugang ro tatlong ka suspected shabu.
Si Tuclab hay mabuhay eon nga ginamonitor sa isla kon siin may courier sigon raya nga taga Aklan ag sa probinsya it Capiz nagabueo it supply it illegal nga droga.
Nauna eon sigon nga naaresto ro anang kaibahan sa grupo ag si Tuclab hay imaw paeang naaresto matapos nga imaw mismo ro nakipagtransakyon sa poseur-buyer.
Sa makaron ro nasambit nga suspek hay una eon sa kustudiya it Malay PNP ag posibleng magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002.
