KALIBO, Aklan—Uman nga naging inspirasyon ro sangka Akeanon matapos nga mag top 7 sa nagtapos nga Aeronautical Engineer Licensure Exams.
Si Engr. Deomary Angelo Beric Franco tumandok it Barangay Poblacion, Ibajay ag nagtapos sa PATTS College of Aeronautics hay nakabo-oe it kapin sa 85.60 percent nga score rason agud nga makasueod imaw sa Top 10.
Sa intebyu it Bombo Radyo Kalibo ginpahayag ni Engr. Franco nga indi sa gihapon imaw makapati nga bukon eamang it pagkapasar ro gintao kana kungdi nakaibahan pa imaw sa mga nagpangibabaw sa nasambit nga eksaminasyon.
Ginapahayag nga haeos katunga ukon kabuligan nga 108 it 241 sa mga nagbo-oe it nasambit nga exam ro nakapasar sa bilog nga nasyon sandig sa datos it Professional Regulation Commission (PRC).
Si Don Mc Lyn Andales Camus it University of Perpetual Help System Dalta-Las Piñas ag Jharie Mae Tan Soriano maghalin sa FEATI University ro nagpanguna sa nasambitan nga eksaminasyon nga may unang nabo-oe nga score nga 86.85 percent.
Una man sa ikaywang pwesto si Jesher Abello Garde, nga parehong maghalin sa University of Perpetual Help System Dalta-Las Piñas ag may score nga 85.95 percent.
Ginsundan ni Andrei Jefferson Bolo Vadepeñas it Philippine State College of Aeronautics-Pasay nga may 85.85 percent.
Samtang, owa man it eskwelahan nga ginpangaeanan bilang “top-performing school.”
Suno sa PRC nga ro may 50 passing examinees nga may unang indi magnaba sa 80 percent passing rate ro ginakabig nga “top performing schools.”
Nasayuran nga ro nasambit nga licensure exams hay ginpatigayon sa PRC testing centers sa Metro Manila, Cebu, Davao ag Pampanga umpisa November 16 hasta 18, 2021.
