KALIBO, Aklan—Uman nga nagtao it bugae sa probinsya it Aklan ro sangka Aklanon matapos nga mag-top sa nagtapos nga Chemical Technician Examination.
Si Ms. Aira Rose Panadero ag tumandok it banwa it Altavas hay Top 10 sa kabilugang nga nagbo-oe it nasambitan nga eksaminasyon.
Nagtapos imaw it kursong Bachelor of Science in Chemistry sa Central Philippine University (CPU) sa siyudad it Iloilo.
Sa makarun hay presente imaw nga nagaturo sa CPU matapos nga ma-absorb pagkatapos it anang pagtuon sa kolehiyo.
Sa interbyu it Bombo Radyo Kalibo, ginpahayag ni Panadero nga hasta makarun hay indi sa gihapon imaw makapati nga nakaibahan imaw sa top 10.
Medyo malisod man sigon ro anang inagyan bangud sa gindungan nana ro anang pagtrabaho ag pagreview man para sa exam.
Proud sigon imaw ag sa ikaywang beses sigon nana nga pagbo-oe it eksaminasyon hay anang gin-atubang ro anang phobia.
Dag-on 2014 kat una imaw nga nagtake it exam sa chemist.
Pagkatapos it pitong dag-on hay uman imaw nga nagdesisyon nga magbo-oe it exam sa anang field ag naging madinaeag-on.
Sa makarun hay gusto na anay sigon nga magfocus sa anang pagturo agud nga maipakigbahin ro anang mga natun-an.
