KALIBO, Aklan—Ginpakamayad eun lang ni Mr. Danilo Lopez, 62 anyos ag residente it Barangay Libas, Banga nga ipablotter sa Banga PNP si barangay kapitan Joel Retino matapos nga magkriar it kinagamo ro anang mga kaibahan sa sangka birthday party.
Suno kay Lopez nga ko nagtaliwan nga adlaw hay kapin sa 26 ka mga persona nga kaabuan hay miyembro it LGBTQ+ community ro nagpatigayon it birthday party sa ginaparentahan nga baeay it anang igmanghod nga si Julito Lopez.
Una man sigon ro presensiya ni Kapitan Retino sa nasambitan nga birthday party apang makit-an nga owa raya nagasunod sa ginapatuman nga health protocol.
Samtang, ginpahayag pa kara nga ro ibang mga bisita hay maghalin pa sa barangay Tabayon ag sa banwa it Balete.
Sa makarun hay gusto na sigon nga sabton ni Kapitan Retino ro anang reklamo.
Ginkuwestiyon man kara ro owa pag-aresto it Banga PNP sa maabo pang iba nga una sa birthday party nga klaro sigon nga may gin-eabag sa health protocol kontra covid-19.
Samtang, sa pihak nga parte, ginpahayag ni Barangay Kapitan Joel Retino nga owa imaw it ideya nga maabong bisita sa nasambitan nga birthday party.
Ko una hay gin-imbitahan sigon imaw it anang barkada nga mag-adto apang anang ginpamalibaran.
Apang ko ulihi hay naalarma imaw kat nabatian nana nga maabong tawo lugar rason nga andang ginbisitahan.
Ginsita sigon nana ro mga raya ag gilayon man nga nag-uli sa andang baeay.
