KALIBO, Aklan—Uman nga ginpamatud-an it sangka deboto ni Sr. Santo Niňo nga owa it imposibleng maitao it Ginoo ro ginapangayo nga bagay kung ginasundan it pagpangamuyo.
Suno kay Annalie Pelayo Ojano nga umpisa nga unga pa eamang imaw hay mabahoe eun ro pagpati it anang pamilya sa milagro nga ginahimo ni Sr. Santo Niňo.
Bangud kara hay ginpili sigon nanda it anang asawa nga magsimba ag mag-eapit sa nasambitan nga Santo ko mga tiyempo nga sanda nalisdan nga makaangkon it unga.
Pamaagi sigon sa hantop nga debosyon ag perming pagpangamuyo hay ginpromisa nanda nga kung makaangkon sanda it unga hay anda rayang pagapabahoeon nga may kahadlok sa Diyos ag magakilaea sa manami nga hinimuan it nasambitan nga Santo.
Bangud man nga nagapati imaw nga owa it maeain kung anang tistingan ro pagpangayo it milagro hay ginpadayun eamang nana ro anang debosyon hasta nga ko ulihi hay nagnabdos imaw sa anang panganay nga ungang eaeaki.
Maskin nga nalisdan sa anang pagnabdos hay natigayon nana nga maibun-ag ro unga nga makarun hay sangka 23 anyos eun.
Samtang eubos man ro anang kalipay nga bukon eamang it sambilog kungdi matapos nanda nga magka-baby hay nasundan pa ag raya tanan hay anang ginapasaeamatan bangud kay Sr. Santo Niňo.
