Kalibo Aklan ——Confine sa Aklan Provincial Hospital ro sangka eaeaki matapos nga gin-eabo sa anda mismong panimaeay sa Brgy. Agbalogo, Makato.
Nag-angkon it tatlo ka mga lastro sa eawas partikular sa anang tuo nga porsyon it dueonggan ag daywang ka mga alima ro biktimang ginkilaea kay Jester Brent Tanyala, 24-anyos kasunod it pagpang-eabo it suspek nga si Dexter Persol, 24-anyos, parehong residente it nasambitang lugar.
Base sa imbestigasyon it Makato PNP, naga-inom ro biktima kaibahan ro anang tatlong barkada nga sanday Benedict Tanyala, certain Julio ag certain Romy sa andang panimaeay kabi-i.
Kung sa siin gulpi eamang nga nag-abot ro suspek ag ginkompronta ro biktima angot sa pagtueop kara sa anang igmanghod.
Maid-id man nga ginpamalibaran it biktima ro alegasyon kana ni Persol ag gin-insister nga bukon it imaw ro responsible sa pagpanakit.
Bangud sa pagka-impito hay gintueop it biktima ro suspek kung siin madasig man raya nga naggabot it sanduko.
Target kunta nga eab-on ni Persol ro ueo it biktima ag sa mayad nga swerte hay nahimo raya nana nga masagang apang natigayun man nga maabot ro anang tuo nga dueonggan.
Sa pangaywa nga paghana it pag-eabo it suspek hay nahimo man gihapon rayang masagang it alima it biktima rason para mag-angkon it mga lastro ro magtimbang karang alima.
Sa pagresponde it mga otoridad, insigidang gindaea sa ospital ro biktima samtang naaresto man ro suspek pasado alas 9 kabi-i sa andang panimaeay.
Si Persol hay presenteng nakakulong sa Makato Police Station ag magapangatubang it kasong frustrated homicide.
