KALIBO, Aklan—Sangka ginang ro nagdangop sa Bombo Radyo Kalibo agud nga ireklamo ro andang punong barangay matapos ro alegasyon nga ginhambaean imaw kara nga manugtago it kriminal ag manakaw.
Suno sa tagreklamo nga si Mrs. Erna Castro it Barangay Bacan, Banga nga ko nagtaliwan nga domingo hay nag agto sa andang baeay si punong barangay Allen Robelo kaibahan ro mga intelligence operatives it Kalibo Municipal Police Station ag gina-usoy ro daywang ka mga suspek nga ginaturo nga responsabli sa pagpanakaw it mountain bike sa banwa it Kalibo.
Ro daywang kaeapitbaeay nana hay madinaeag-on nga natumod ag naaresto it mga otoridad kaibahan nga narekober ro gintakaw nga bisikleta.
Samtang, nag-eain sigon ro anang buot matapos nga ginpahayag ni kapitan Robelo nga taeaguan it kriminal ro andang compound ag raya eon ro ikatlong kahigayunan nga may nadakpan sa lugar.
Owa pa sigon nakuntento ro opisyal ag ginduro-duro imaw kadungan ro pagpaandam kana nga raya eon ro ulihing chansa nga igatau kana.
Bangud kara, ro insidente hay nagtuga it kahuy-anan kana ag sa anang pamilya kun sa siin maskin sigon ro anang mga unga hay gina-bully sa eskwelahan.
Apela nana sa bilog nga konseho nga punduhon eon ro mga mabug-at ag owa it basehan nga nga alegasyon kontra kana.
Pirme man suno kana imaw nga ginapa-summon it barangay maskin nga owa imaw direktang kahilabtanan sa reklamo.
Sa pihak nga parte, mabahoe ro pagpati ni Castro nga nag-ugat ro owa pagka-ilintindihan nanda ni kapitan Robelo matapos nga ginpamalibaran nana ro hinyu kara kato nga ipaisoe ro kasong rape nga ginpasaka kontra sa anang amigo may kaangtanan sa gina alegar nga pag-rape sa anang adopted daughter nga padayun nga ginapamatian makaron sa korte.
