Nasapwan nga nakahandusay ag uwa eon it kabuhi ro sangka lola matapos nga maeomos sa suba nga sakop it Brgy. Ginictan, Altavas.
Ginkilaea ro biktima nga si Sally Plana, 74-anyos ag residente it nasambit nga lugar.
Suno sa anang onga nga si Marlon Plana, nakasanayan eon sigon it anang ina nga mag-eaba sa suba it anang inuba nga pilang bilog manlang nga eambong bangud nga mas madali sigon mag-eaba sa suba.
Kahapon it agahon kat ginahueat eon nanda ro ginang para kunta magpamahaw hay uwa gihapon raya nakauli kon siin ginpakamayad anay it anang misis nga mag-adto sa suba agud nga paligsan kunta ro andang ayam apang tumambad kana ro lola nga nakakaya ag uwa eon it alintro.
Ginpahayag dugang nga insigida nanda raya nga ginpatindog ag gintinguhaan pa nga irevive apang mismong ro miyembro it Municipal Disaster Risk Reduction Management Office ukon MDRRMO nga nagresponde sa insidente ro naghambae nga uwa eon it pulso ro biktima kat anda raya nga naabutan.
Posible suno kay Plana nga nadanlog ro anang ina ag pagkatumba hay tumama sa bato nga gintunaan it anang pagkalipong ag bangud sa may tubi raya natumba hay posible nga naeomos ro lola.
Ro suba hay kapin sa 40 metros eamang ro kaeayuon maghalin sa andang baeay.
