KALIBO, Aklan—Naugdaw ro sangka panimaeay matapos nga masunog sa Brgy. Bato-Bato, Libacao.
Suno kay SFO4 Joriz C.Timonera it Bureau of Fire Protection ukon BFP Libacao, ro baeay nga human sa light materials hay ginapanag-iyahan ni Merlinda Salonzo, 60 anyos ag residente it nasambit nga lugar.
Sa andang inisyal nga imbestigasyon, posibleng may ginaeaha ro biktima sa anang dapog kon sa siin napabay-an hasta sa nag-eontad ro sunog.
Kapin sa P19,600 pesos ro ginatantya nga danyos it nasambit nga insidente.
Ginpahayag dugang ni SFO4 Timonera nga maeayo ro nasambit nga lugar rason nga uwa narespondehan it mga fire fighters bangud sa mdasig nga gin-eamon it kaeayo ro baeay.
Samtang sa pihak nga parte, magaarangkada makaron nga adlaw it Biyernes, Marso uno ro kick-off activities it BFP Libacao angot sa selebrasyon it Fire Prevention Month.
Ginpaathag ni SFO4 Timonera nga bukon eamang it sa buean it Marso dapat dumdumon ro fire prevention kundi adlaw-adlaw gid bangud nga ro sunog hay uwa it ginataeana nga adlaw ukon buean kon mag-eontad ro insidente.
Bangud kara, hugot ro padumdom ni SFO4 Timonera nga sa tyempo it tag-init hay likawan gid magdap-ong partikular kon maeapit sa panimaeay ag maging responsible ro tanan para malikawan ro sunog.
