KALIBO, Aklan—Gin-uean it pagdayaw maghalin sa mga netizen ro sangka pulis matapos nga buligan kara ro ginang nga maka-unga sa Barangay Afga, Tangalan ko nagtaliwan nga Enero 27.
Maging si Philippine National Police Chief General Dionardo Carlos hay nagtao it pagkilaea sa manami nga hinimuan ni Patrolman Lhar Talaga, Assistant Police Community Relations it Caticlan Airport Police Station, Aviation Security Unit 6 bangud sa madasig karang aksiyon sa nagakinahangean it anang bulig.
Sa interbyu it Bombo Radyo, ginpahayag it nagviral nga pulis nga si Patrolman Lhar Talaga nga bilang sangka registered ag makarun hay nagapanerbisyo eun bilang pulis nga apisar nga imaw hay off duty sa mismong adlaw nga imaw hay ginpatawag agud nga buligan ro manug-unga nga ginang hay owa imaw nagdaywang isip nga buligan raya.
Gin-adtunan sigon imaw it nanay it manug-unga nga babayi ag dikato hay insigida man imaw nga nag-adto sa panimaeay kara.
Kasunod kara gilayon imaw nga nagpatigayon it Internal Examination (IE) sa pasyente ag dikato nasyuran nga imaw hay may 9-cm cervical dilation, ro senyalis nga raya hay maeapit eun lang magdeliver it anang baby.
Matapos nga makumpirma ro sitwasyon, owa eun sigon imaw nag-uyang it oras ag ginpadayun ro pagpa-unga kay Rachel Mae Panagsagan pamaagi sa normal delivery.
