KALIBO, Aklan — Ginsuhestiyon ni Senador Francis Tolentino ro pag-angkon it traffic management code it kada lokal nga gobyerno sa bilog nga Pilipinas agud nga makaangkon it disiplina sa karsada.
Raya hay kasunod it anang pagtambong sa ground breaking ceremony it igatukod nga traffic light, agahon it Sabado, Setyembre 28 sa Brgy. Tigayon, Kalibo.
Dugang pa ni Tolentino nga mag-eowas sa pagtukod it maabu nga mga traffic lights nga sangka simbolo it disiplina, importante man ro pagbilog it traffic management code agud nga makaangkon it mga sueundanan eakip ro mga penalidad sa sin-o man nga maga-eabag sa batas-trapiko.
Nagapati ro senador nga ro kawad-an it disiplina ro nagapangunang problema it Pilipinas sa mga karsadahon.
Bangud nga gateway ro Kalibo paagto sa isla it Boracay, sangka sikat nga tourist destination sa bilog nga kalibutan, nagakabagay suno kana nga makaangkon it maayos nga daeagan it trapiko.
