KALIBO, Aklan–Mabahoe ro pagpasaeamat it sangka ginang nga nagapanag-iya it sangka pouch nga gin turn-over it sangka tricycle driver sa Broadcast Center it Bombo Radyo Kalibo kainang agahon.
Ro huwaran ag tampad nga tricycle driver hay nakilaea kay Harold Halasan, 35-anyos it Brgy. Polo, Banga.
Ginpahayag ni Exelsa Dela Cruz, residente it Brgy. Mabilo, Kalibo nga owa nana napan-ohan nga nawigit ro anang pouch samtang nagasakay sa sangka tricyle nga may biyaheng Poblacion, Kalibo.
Napan-ohan eamang sigon nana nga owa eon ro anang pouch kat imaw eon ro masunod nga magabayad sa cashier sa sueod it sangka establisyemento.
Suno pa kay nanay Exelsa nga nagdesider pa imaw nga magparecord sa Kalibo Police Station apang nakabaton imaw it tawag kung siin ro anang pouch hay ginturn-over sa estasyon it Bombo Radyo.
Nasayuran nga naga-abot sa P5,000 nga balor it kwarta, mga ID’s ag mga importanteng dokumento ro sueod it pouch.
Mabahoe man ro pagpasaeamat ni Nanay Exelsa sa driver it tricycle nga owa nagduha-duha nga ibalik ro anang pouch.
