Sangka tricycle sa may bahin it Purok 5, C. Laserna St., Poblacion, Kalibo, Aklan ro owa man nakatakas sa serye it pagpaeanakawan it mga motorsiklo sa probinsya it Aklan.
Nakibot eon lang tag tag-iya it sangka tricycle nga ginkilaea kay Richard Castillo Montero, 24-anyos it Purok 4, C. Laserna St.,nga pagbugtaw nana kahapon it agahon bandang alas-9 hay owa eon ro anang ginparada nga Honda TMX Tricycle.
Sandig man sa pag review sa mga CCTV footages hay nakit-an ro sangka eaeaki nga nakabisekleta ro nag-agi sa lugar kung siin nakaparada ro nasambit nga tricycle it biktima.
Ginpabinit pa nana kara ro anang bisekleta ag ginboue ro tricycle ag tag natigayon nga mapaandar hay naglibot pa raya sa nagakaeain-eain nga lugar sa banwa it Kalibo.
Gilayon nga ginreport it biktima ro insidente sa Kalibo PNP ag nagdangop sa Bombo Radyo Kalibo para magpangayo it bulig para makit-an eagi ro nasambit nga tricycle.
Sa padayon nga ginpatigayong imbestigasyon it katapo it mga kapulisan ag sa bulig it residente it brgy. Mantiguib , Makato hay natigayon nga marekober ro tricycle.
Suno kay Montero nga nakabaton sigon sanda it tawag bandang alas-6 kabi-e nga may nakapan-o kung siin ro andang tricycle.
Kaibahan ro Kalibo PNP ag Makato PNP gilayon nga gin-adtonan it biktima ro nasambit nga lugar para kumpirmahon ro napan-ohan nga tricyle nga nakaparada sa may baraka.
Ginkumpirma man it biktima nga anda ro nasapwan nga tricycle sa may brgy. Mantiguib sa banwa it Makato.
Padayon man nga paga-imbestigahan it mga katapo it kapulisan ro makapilang beses eon nga kaso it pagpanakaw it mga motorsiklo ukon tricycle sa nagakaeain-eain nga banwa sa probinsya it Aklan.
Pagatutukan man kung may kamatuoran baea kung master key gidman ro ginagamit it mga suspek sa pagpanakaw.
Sa makaron indi pa gid matumod kung sin-o ro sa likod it mga serye it paeanakawan ag desidido man ro biktima nga pasakaan raya it kaso para owa eon sigon it mabiktima pang iba.
