Ginahinyu makaron it sangka konsehal nga makaangkon man it satellite office ro Office of the Vice President sa banwa it Kalibo.
Suno kay sangguniang bayan member Matt Aaron Guzman nga sangka resolusyon ro anang gindihon angot kara ag aprubado man it konseho.
Ro inisyatibo sigon nga magtukod it satellite offices sa pilang mga lugar sa bilog nga nasyon hay ro handum man it bise presidente agud nga masiguro nga ro anang taeatapan hay maging maeapit sa tawo.
Ro bise presidente hay nagaserbi man nga education secretary.
Sa makaron hay natigayon eon nga maipaabot ro andang request ag nagahueat eon lang it approcval halin sa OVP.
Engkaso nga mataw-an it katumanan, ginpahayag ni SB guzman nga bukon eamang it mga akaeanon ro maserbisyuhan kara kundi ro mga kaiping nga probinsiya it Antique ag Romblon.
Nasayuran nga pila sa mga ginatratar it OVP hay ro pagtau it parehong medical ag burial assistance kamana man ro iba pang social services ag development projects.
Pila pa sa mga programang ginpakilaea it OVP hay ro Libreng Sakay kun sa siin nagatau it libreng transportation service sa publiko sa pilang pili nga lugar sa nasyon.
Kaeabanan suno kana sa target nga butangan it mga satellite offices kara hay sa guwa it mga mabahoe nga siyudad.
Pila sa mga may una eon nga satellite offices it OVP hay ro Zamboanga, Cebu, Davao, Tacloban, Tandag, ag Dagupan .
