KALIBO, Aklan — Plano makaron ni Sangguniang Bayan member Raymar Rebaldo nga ipasaka sa regional office it Department of Public Works and Highways (DPWH-6) ro ginakwestiyon nana nga PUV bus stop and waiting station project sa may parte it Mabini St. Kalibo.
Suno kana nga padayun imaw nga nakikipag-angot kay Kalibo Municipal Engineer Amy Francisco para sa posibleng update halin sa DPWH regional office.
Raya hay matapos nga ginpadaea eon nanda ro sangka resolusyon nga nagahinyu nga ipapundo ro nasambit nga proyekto ag ibalik sa dati ro andang ginpangkutkutan nga lugar ag ginpangsamad nga mga drainage system.
Dugang pa ni Rebaldo nga uman nana nga pagabuksan ro isyu sa session it konseho agud nga makabo-oe it suhestiyon.
Importante suno kana nga maaksyunan eagi ro problema bangud nga ro Kalibo hay makabig nga catch basin ag ginaeauman nga ro bilog nga nasyon hay makaeksperiensiya makaron it sigidas nga pag-uean tuga it La Nina phenomenon.
Nauna eon nga gin insister ni Rebaldo nga ro proyekto hay pag-eabag sa DILG circular nga road clearing operation ag Commission on Audit (COA) circular bangud sa kawad-an it billboard nga nagapahisayod angot sa kaundan it proyekto para sa kasayuran it publiko.
