KALIBO, Aklan—Temporaryong ginsaylo sa beachfront halin sa Bolabog beach ro tanan nga mga water sports activities sa isla it Boracay bangud sa mabaskog nga hangin ag humbak tuga it southwest moon ukon habagat nga daea it bagyong Kristine.
Suno kay Capt. Rodolfo dela Peña, station commander it Philippine Coast Guard ukon PCG Aklan nga kahapon nga adlaw it Lunes, Oktubre 21 hay nagpaguwa eon sanda it abiso angot kara.
Halin sa Bolabog area ukon back beach hay ginsaylo anay sa beachfront ro tanan nga mga aktibidad kapareho it sea sports, island hopping, scuba diving, helmet diving, paraw ag iba pa para sa kaeowasan it mga turista.
Dugang pa ni Capt dela Peña nga nakipag-angot sanda sa lokal nga gobyerno it Malay ag Boracay Water Sports Association angot sa ginpaguwa nga sea travel advisory.
Ginalaygayan man kara ro mga mangingisda nga indi anay mag-eayag bangud nga maskin nga kalmado ro dagat apang mabahoe ro posibilidad nga makaagkon it gale warning bangud sa bagyong Kristine nga delikado sa mga maintok nga saeakyang pandagat.
