KALIBO, Aklan—Hugut nga ginabawae anay it Philippine Coast Guard (PCG)-Aklan ro pagpatigayon it anumang seasports activities sa Boracay ag bilog nga probinsiya it Aklan.
Sa ginpaguwa nga advisory nga pirmado ni Coast Guard Commander Jose Jacinto, Jr., ginabawae anay ro nasambit nga aktibidad ag ro pagpangisda eamang ro ginapasugtan.
Raya hay bilang pagsunod sa ginpaguwa nga Executive Order No. 019 series of 2021 ni Aklan Governor Florencio Miraflores angot sa pagbutang sa Aklan sa modified enhanced community quarantine (MECQ) hasta sa Agosto 15 kasunod it pagtaas it kaso it coronavirus disease 2019 (COVID-19).
Pila sa mga sikat nga seasports activities sa Boracay hay ro banana boat ride, jet ski, paraw sailing, windsurfing, kiteboarding ag iba pa.
