KALIBO, Aklan—Ginklaro it Provincial Health Office (PHO) Aklan nga uwa ginarekomenda it Department of Health ukon DOH ro pagpatigayon it tuob ukon steam inhalation sa mga tinamaan it coronavirus infectious disease ukon Covid-19.
Suno kay Provincial Health Officer 1 Dr. Cornelio Cuatchon nga uwa pa it ebidensiya ukon pamatuod nga nakakabueong it COVID-19 ro “tuob” ukon steam inhalation.
Bukon man sigon raya ro pamaagi para makalikaw sa sakit.
Ginpahayag dugang ni Dr. Cuatchon nga mas makapamayad gihapon nga sundon ro mga health protocols kaparehas it mandatory nga pagsuksok it face mask, tamang paghugas it alima ag pag-obserba sa physical distancing para indi matapnan it sakit.
Gin-engganyo man it opisyal ro tanan nga mas pang pabaskugon ro immune system agud nga makasukoe ro eawas sa virus engkaso nga maeatnan it makamataeay nga sakit.
Nasayuran nga sangka Covid-19 patient ro namatay sa Cagayan de Oro matapos nga nagdepende sa “tuob” ukon steam inhalation.
Sa pinakaulihing datos it DOH, kapin sa 35,455 eon ro mga tinamaan it nasambit nga sakit sa nasyon.
Sa nasambitang numero, 1,244 mat-a ro namatay samtang 9,686 ro nakarecover matapos ro pagbueong ag quarantine procedure.
