Suplay it baboy, nagapabilin nga bastante makaron nga holiday season

KALIBO, Aklan–Bumuhos ro mga bumaeakae sa Oyo Torong talipapa makaron nga adlaw para magbakae it karne it baboy nga igahanda sa Paskwa.

Suno kay Martin Capistrano, sangka meat vendor nga naging masako ro andang adlaw bangud sa kaabu it mga pumueoyo nga nagpamakae.

Makabig sigon raya nga sangka manami nga regalo kanda nga mga negosyante bangud nakaangkon sanda it mabahoe nga kita ag haeos naubos pa ro andang baligya.

Naga-abot sigon sa 130 kilos tanan ro anang naibaligya nga karne sa sueod eamang it sang adlaw.

Ro kada kilo it karne it baboy hay nagahampang sa P200 hasta P220.

Ginpasiguro man kara nga bastante ro suplay it baboy hasta sa pagsug-aeaw it bag-ong dag-on.