KALIBO, Aklan — Bastante pa ro supply it bugas sa mga baealigyaan sa Aklan sa pihak it pag-agi it mga mabaskog nga bagyo partikular ro bagyong Tino.
Sa pahayag ni Engr. Alexys Apolonio it Office of the Provincial Agriculture (OPA)-Aklan nga minatuod nga nabawasan ro produksyon it paeay it probinsiya nga indi makasabat sa demand ukon kinahangeanon it mga pumueuyu.
Apang bangud sa mayad nga trading sa ibang probinsiya nga may bastante nga supply rason nga nasabat ro kakueangan.
Sa pihak nga parte, uman nga maga-arangkada sa Enero it masunod nga dag-on ro pagbaligya it P20 per kilo it bugas sa iba pang banwa sa Aklan.
Ginpahayag ni Engr. Apolonio nga owa eubusan nga na-implement ro nasambit nga programa makaron nga 2025 bangud nga bukon it bastante ro availability it bugas nga gina-distribute.
Ginasigurado sigon nanda nga ro bugas nga gina-withdraw sa NFA ag ginabaligya it mga benepisyaryo it programa hay gina-usisa it mayad nga may kalidad.
Dugang pa nga mataas ro demand it bugas kada buean it Disyembre nga ginapanupod bilang ayuda kada Paskwa.
