Padayon nga ginatugis makaron it otoridad it Libacao Municipal Police Station ro ginaturo nga suspek sa pagpang-eabo sa mag-asawa sa Brgy. Janlud, Libacao.
Una kara, nangindueaan si Jomar Esto, 30-anyos, residente it nasambit nga barangay matapos nga gin-eabo ro mag-asawa nga ana man nga kasimaryo nga ginkilaeang sanday Lorjei Gregorio, 44- anyos kon siin dead on arrival sa provincial hospital samtang si Cherrie Ann Gregorio, 42-anyos hay padayon pa makaron nga ginbueong sa nasambit nga ospital.
Suno sa panaysayon it tiya ni Cherre Ann nga si Alicia Nemis, naga-ihapon sigon ro mag-asawa kat gulpi nga sumaka ro suspek sa andang baeay kon siin ro sanduko nga nakabutang sa katre nga ginapanag-iyahan it biktima hay dato man ro ginbueo ni Esto ag gin-eabo kanda nga daywa.
May kaangtanan kara, nakaangkon it fatal nga lastro sa ueo ag bibig si Lorjei nga gintunaan it anang hinali nga kamatayon samtang si Cherrie Ann hay ninahan man sa daywang ka alima.
Panawagan it pamilya sa suspek nga magsurender eon ag atubadngon ro krimen nga anang ginhimo.
