KALIBO, Aklan—Nagapangatubang sa kasong murder ro sangka 35-anyos nga eaeaki nga ginaturo nga nakabaril ag nakapatay kay Barangay Kagawad Silverio Puod it Brgy. Tibiawan, Makato, Aklan.
Positibong ginkilaea it testigo nga sangka chief tanod ro suspek nga si Richard Ortiz, residente it Sitio Awayon, Brgy. Agbalogo sa nasambit nga banwa.
Suno kay P/Staff Sgt. James Padasas, imbestigador it Makato Police Station nga boluntaryong nagdangop sa andang estasyon ro testigo ag ginsaysay ro anang mga nakita.
Nakita sigon nana si Ortiz nga may gina-eagas ag may daeang baril, apang owa nana namukhaan kun sin-o ro anang gina-eagas bangud nga maligwin ro lugar.
Kasunod kara, nakabati imaw it sunod-sunod nga eupok it baril.
Pagka-aga hay nabalitaan nana nga si Konsehal Puod ro pinatay rason nga insigida raya nga nag-agto sa pulisya.
Sa ginkasa nga hot pursuit operation, naaresto ro suspek sa andang baeay, apang hugut kara nga ginpamalibaran nga may kahilabtanan imaw sa krimen.
Presenteng nakakulong sa lock up cell it Makato PNP ro suspek.
Nasayuran nga ro konsehal hay miyembro it LGBTQ community ag bread winner it pamilya.
Ginatutukan nga motibo sa krimen ro owa pagka-ilintindihan it pamilya sa andang mga propiyedad, apang owa man nanda ginaduea ro anggulo nga may nagpapatay sa opisyal.
