May una gali nga mga nurses sa private hospital nga nagasweldo eamang it P19,000 pesos kada buean.
Sa maisot nga sweldo nga ginabaton hay owa pa kara ginakaltas ro tax, SSS ag Pag-IBIG contributions.
Rason nga sangkiri eon lang ro nabilin sa mga makaeoeo-oy nga nurses nga ginakabig nga mga “bag-ong baganihan bangud sa pagserbisyo nanda makaron nga tiempo it pandemya.
Mayad ag napa-igo-igo pa it mga nurse sa pribadong ospital ro andang sangkiri nga suweldo.
Paalin kun may pamilya ro nurse?
Paalin kun may ginasuportahang ginikanan ukon igmanghud.
Mas abanse it sangkiri ro mga una sa pampublikong ospital bangud nga ro mga nurse kara hay nagasuweldo it P30,000 pesos.
Medyu mataas eon ro nasambit nga sweldo apang kapos sa gihapon sa kataason it mga baeak-eon makaron.
Paalin kun pamilyado ag may ginasuportahan ro mga nurses sa public hospital?
Masyadong kueang ro andang suweldo.
Ko Martes, nagprotesta ro healthcare workers sa atubang it taeatapan it Department of Health (DOH) ag ginhinyu nga i-release eon ro andang One COVID Allowance para sa Enero hasta Hunyo 2022.
Apang may una gihapon nga owa nabaton ro andang allowance para sa Hulyo hasta Disyembre 2021.
Ro pagtau it allowance hay sanday sa laye nga RA 11712 nga ginpirmahan ni dating President Duterte ko nagtaliwan nga dag-on.
Manaba eon ro suweldo it mga nurses ag iba pang Health care workers apang pati ro andang allowances hay indi maitau sa oras.
Makaeoeo-oy ro kahimtangan it mga nurses.
Ko nagtaliwan nga domingo hay ginhambae ni President Ferdinand Marcos nga parehason ro sweldo it nurses sa private ag public hospitals.
Kabay nga matuman ro ginhambae ag kon pwede nga obrahon nga P50,000 pesos ro suweldo it nurses.
Kun nagasweldo sanda it bastante, indi eon sanda magahandum nga maga agto sa ibang nasyon agud nga idtu nga magtrabaho
