Ginbasura it Taguig City Prosecutor’s Office ro perjury complaint ni Vice President Sara Duterte kontra sa anang gina-alegar nga dating aide nga si Ramil Madriaga bangud sa “insufficiency of evidence” ukon kakueangan it ebidensya.
Sa 19-panig nga resolusyon, ginpahayag it mga prosecutor nga bukon it bastante ro mga ebidensyang ginplastar ni Duterte agud mapamatud-an nga hungod nga naghimo si Madriaga it mga materyal nga saea nga pahayag sa idaeum it sinumpaan nga panaysayon. Ko Marso, nagpasaka si Duterte it unang reklamo matapos akusahan imaw ni Madriaga sa Ombudsman nga naghatud sigon it mabahoe nga kantidad it kwarta sa nagkaeain-eain nga tawo sa anang mandu.
Ginpamalibaran man ni Duterte ro mga alegasyon ag ginpahayag nga owa imaw it personal ukon propesyonal nga kaangtanan kay Madriaga. Samtang, ginpahayag it abogado ni Madriaga nga ro desisyon hay sangka importanteng pagpamatuod sa panindugan it andang kliyente ag pamatuod nga dapat magpangibabaw ro ebidensya ag laye.
