Hugut nga ginpamalibaran ni Philippine Coast Guard (PCG) spokesperson for the West Philippine Sea (WPS) Rear Admiral Jay Tarriela ro pahayag it China Coast Guard (CCG) nga nagsueod sigon ro mga tawuhan it Philippine Navy sa Ayungin Shoal kasunod it insidenteng natabu ko Hulyo 20.
Suno kay Tarriela, sa sueod it exclusive economic zone (EEZ) ag continental shelf it Pilipinas ro Ayungin Shoal base sa 2016 Arbitral Award ag sa United Nations Convention on the Law of the Sea (UNCLOS). Dugang pa nga ro CCG ro nagpaeapit sa BRP Sierra Madre ag nagpatigayon it bukon it awtorisadong inspeksiyon gamit ro sangka rigid hull inflatable boat nga may sakay nga waeong tawuhan.
Ginpahayag man it PCG nga nagpadaea ro Armed Forces of the Philippines it rubber boats agud nga matawhay nga pahalinon ro barko it China, apang nagresulta raya sa bayolenteng komprontasyon.
Sangka soldadong Pilipino ro naninahan matapos sigon nga bunaean it sangka miyembro it Chinese crew gamit ro kahoy nga baton, samtang nasamad man ro sambilog sa mga rubber boat it Pilipinas.
Ginpamilit ni Tarriela nga ro China ro nag-umpisa it insidente ag owa raya it legal nga hurisdiksiyon sa Ayungin Shoal, nga makit-an sa sueod it EEZ it Pilipinas ag masobra sa 600 nautical miles halin sa Hainan Island it China.
