Napuno it emosyon ro pagtapos it hampang it tennis legend nga si Serena Williams matapos nga mapiyerdi sa third round sa US Open kay Ajla Tomljanovic it Australia sa score nga 7-5, 6-7 (4), 6-1.
Nagapanangison si Williams eabi eon ag grabe ro pag-cheer kana it masobra sa 23,000 fans nga bumuhos sa Arthur Ashe Stadium para saksihan ro ginasugid nga ulihing hampang sa anang tennis carrer.
Sa pihak nga 40-anyos eon si Williams, bukon raya it naging rason para imaw hay insigidas nga mapiyerdi sa kontra nga mas bata ag 29-anyos eamang nga si Ajla nga kung siin umabot sa tatlong oras ro game.
Samtang, kung ginaeauman it tanan hay tapos eon ro paghampang ni Serena sa tennis court, owa pa sigon it kategorikal nga deklarasyon nga magaretired eon raya.
Nagpaabot pa ro 23-time Grand Slam champion nga may igabuga pa imaw, apisar nga may sambilog eon imaw nga onga ag makarong buean hay igaselebrar nana ro anang ika-41 nga kaadlawan.
