KALIBO, Aklan—Kasong unjust vexation ro paga-atubangon it sangka 47 anyos nga tricycle driver matapos nga bastuson ro anang daeaga nga pasahero sa banwa it Kalibo.
Suno kay P/Major Willian Aguirre, deputy chief of police it Kalibo Municipal Police Station nga Oktubre 21 kat nagdangop sa police station ro biktima kaibahan ro anang amiga angot sa gina-alegar nga ginhimo nga pagpangbastos kana it suspek, may asawa ag tumandok it malinao.
Base sa reklamo it biktima, halin sa Barangay Pook hay nagsakay imaw it tricycle ag magapahatud kunta sa C. Laserna St. Kalibo.
Apang imbes nga daehon sa anang destinasyon hay gina alegar nga gindaea imaw it driver sa Pook port.
Ginhambaean pa sigon imaw nga temprano pa rason nga magawarang-warang anay sanda sa nasambit nga lugar.
Sa pagpundo it tricycle hay gulpi eamang sigon imaw gin-agbayan ag ginhambaean nga kon pwede imaw nga maging nobya nana.
Samtang nagatangis, nagpaandam sigon ro biktima nga magahimo it eskandalo kon indi imaw iga-uli it driver.
Bangud kara, nagpanaw sigon sanda ag gindaea ro biktima sa sangka mall .
Samtang, ginpahayag ni Major Aguirre nga ko Martes hay nag-agto ro driver sa police station agud nga atubangon ro reklamo kontra kana.
Sa uman nanda nga pag-atubang it biktima, gin-aku it suspek ro anang gin-obra nga saea sa daeaga.
Ro insidente hay nagtuga it nerbiyos ag trauma sa biktima.
